1)

Sie sitzt im Zug und het d Chopfhörer aa

Lost iiri Muusig ganz lut

Z’viel Lüt, z’viel Lärm und öpper Fremds näbedraa

Das alles macht se fascht kaputt, fascht kaputt

Es wird erwartet, dass sie use goot

Und a jedes Familie-Fescht

Niemer merkt, dass sie dört am liebschte absyts stoht

Dass sie das stresst mit all de Gescht, mit all de Gescht

Refrain)

Sie isch angerscht, das weiss sie schoo

Doch es will se niemer verstoo

Isch am liebschte einfach dähäi

Statt mit de Lüt zäme, lieber älläi

S Läbe forderet se seer

Und sie frogt sech immer meer:

«Wenn isch das alles, alles verby?

Wenn chan I my sälber sy?»

2)

Und mänggisch wünscht sie sech ä Schild uf dr Stirn

Wo druf stoot: “Sorry, ich bin gestört”

Dass d’Lüt begriffe, dass nid alles rund lauft im Hirn

Und das Föpple ändlech hört, jo ändlech hört

Refrain)

3)

So läbt sie iir Läbe, macht so guet s’goot iir Ding

Ooni Froid und ooni Muet

Denn chunnt Corona und «Social Distancing»

Und ihre goot’s jetzt plötzlech guet!

1)

D'Chilcheglogge schloot drümol und I ligg hellwach im Bett

Wieder so ne Nacht won I nid schlofe cha

Doch das ghört drzu, bin ä Winnetou

Im Gschäft am Morge e grosses Gstürm, s'lauft verchert vo A bis Z

Wieder so ne Tag won I nüd ändre cha

Doch s'isch noni gnue, bin ä Winnetou

Refrain)

Und s'Läbe lauft a mir vrby, he jo

S'isch normal gsi so, ha nüd unternoh

Ha alles akzeptiert und so lo stoh

Bis Du bisch cho

2)

Äimol mehr vrbieg mi und säg jo zu nere Sach

I opfere mi förmlech für e dankends Wort

Wo nid wird cho, s isch halt eso

Und plötzlech kullre Träne d'Bagge abwärts wie ne Bach

I wäiss nid was sich i mis Härz inebohrt

Doch s'wird dure go, s’isch halt eso

Refrain)

Und s'Läbe lauft a mir vrby, he jo

S'isch normal gsi so, ha nüd unternoh

Ha alles akzeptiert und so lo stoh

Bis Du bisch cho

Zwischenteil:

S'wer viel äifacher alles z'loh wie's isch, s'chunnt irgendwenn scho wieder guet

S'wer viel äifacher sich z'arrangiere, so öppis brucht käi Muet

S'wer viel äifacher sich nid z'hinterfroge werum und für was

Doch will mi gärn ha dräih I s'Stürrad umme und gib Gas

3)

D'Bärg- und Talfahrt nimmt langsam ab, bi amne noie Ort acho

I fühl mi wien e Puddel won e Bad het gnoh

Doch es chunnt jetzt guet, ha viel noie Muet

Bi dankbar, dass Du mi dört so i dyni Ärm hesch gnoh

Und mir gsäit hesch was I muess lo goh

Di so z ha tuet guet, git vill noie Muet

Ref)

Und s'Läbe het mr zäigt, es goht jo o - wenn me cha lo go, s’einfch trybe loh

Und s’Läbe nimmt si Wäg jo sowieso – muess nid wüsse wo, s’wird anegoh

Und s’Läbe will mr säge «Hey Du do» – «lo Dis Härz ufgoh, s’isch wunderschön eso»

Und s'Läbe het än angre Wärt becho - will Du bisch cho

1)

I ligg uf ere Matte und I lueg y d’Stärnenacht

Gseh Liechter funkle hundertfach, dr Aablick isch e Pracht

Und wie ne wisse Schleier lit quer übrem Himmelszelt

D’Milchstross, oisi Galaxie, wo d'Sunne o mit drzu zellt

Refrain)

Und I stuun ab dere Schönheit, wo’s do z’gsee git i dr Nacht

All das Liecht wo sich vor so villne Johr uf e Wäg zu ois het gmacht

Ganz niechtern zäigt ois d’Wüsseschaft, wo mir do genau sy

Und I versuech’s z‘begriffe - und füül mi munzig chly

2)

Wusch - ä Sträife quer dur d‘Nacht, ä Stärnschnuppe vergliiet

Und näbedra e Satellit, wo sini Baane ziiet

O wenn's öis nid so vorchunnt, aber mir rase schnäll dur’s All

Und all das hett si Aafang gnoh wyt zrugg mit ‘mne riesige Knall

Refrain)

Und I stuun wie alles im Glychgwicht isch, s’keini Kollisione git

Wien e grossi Chraft alles zämme hebt, und s’niemer usespiggt

Ganz niechtern zäigt ois d’Wüsseschaft, wie oisi Bahn wird sy

Und I vrsuech’s z‘begriffe - und füül my munzig chly

Zwischenteil)

Und sett I hundert Johr alt wärde, was möglich chönnt si,

Wär das nur e Wimpereschlag im Läbe von’re Galaxie

Denn hesch Du gwüsst, dass jedes Atom, wo in ois existiert

Erscht entstande isch, will vor langer Zyt do moll e Sunne isch explodiert

3)

Lueg dört bim Stärnbild Pegasus, ä Näbel gsesch ganz chly

S’isch s’Liecht vo dr Andromeda, dr Nochbers-Galaxy

Und wenn me no vill wyter goht, tief yne y das All

Gsesch Milliarde vo Galaxye, wo schön verteilt sy überall

Refrain)

Und I stuun ab dere Wyti, alles schynt unändlech gross

Die viele Stärne wo’s do z’gseh git mache fassigslos

Ganz niechtern zäigt ois d’Wüsseschaft, wie d‘Dimensione sy

Und I versuech’s z‘begriffe und füül mi - so munzyg chly

Ganz niechtern zäigt ois d’Wüsseschaft, wo mir do genau sy

Und I als Mensch vernäig my - und fühl my ganz munzig chly

1)

Mentig Morge, Du settsch ufstoh, doch dr Körper mögt nid

Zwee Kaffi i leer Maage, so wird dr Gäischt langsam fit

Im Zug äis Gedränge und denn i s'Gschäft ine ghetzt

Zwüsche de Sitzige e Sandwich, wo s‘Mittagässe ersetzt

E noii Ufgab, s'chas niemer angerscht, und Du füülsch Di chli geert

Natürlich näb all däm angre, "s'lauft denn scho nid verchert!"

Uf em Häiwäg spot wird rasch e Pizza verdruggt

Und Du merksch nid was mit Dir passiert - s'isch verruggt

2)

Irgendwenn säit di Körper: "I mach nimmi mit!"

Du willsch es nid verstoo, hesch zum Lose kei Zyt

S goot alles langsamer und d'Energie, die nimmt ab

Du kompensiersch es mit lenger schaffe, doch d’Resärve wärde knapp

S'brüchti öpper, wo Dir jetzt säit: «He, so isch das vercheert!»

Wo's erkennt und Di us däm Hamschterrad zeert

Doch stattdesse wirdsch belächlet, s'will di niemer verstoo

So rennsch Richtig Abgrund und me loot Di lo goo

Refrain)

Isch’s das wirklich, isch das s’Läbe

Wo mir tief in ois drin wäi

Ständig chrampfe bis mir stärbe

Zvill unterwägs, niene dähäi

Immer mehr schaffe und brav nigge

Wie mr das als Ching häi gleert

Gheisch denn um, loot me di ligge

Und du wirdsch das Gfüül nid los, machsch alles vercheert

3)

Und so sitzisch ganz älläi i däm Chämmerli do

D'Klinik isch di dähäi, und es dräiht immer no

Numme langsam chunsch obe abe und d'Landig tuet wee

Du bisch vill zwyt gange, jetzt wo's zspot isch, chasch's gsee

Erschti Fortschritt, wieder e Rückfall, es bruucht viel Geduld

Vo Therapie zu Therapie wird dr gsäit: «S'isch o Dini Schuld»

Medikamänt für Medikamänt wird a dir usprobiert

Und viel zfriie wird verlangt, dass alles wieder funktioniert

Refrain)

Zwischenteil)

Profit iifaare, Chöschte spaare, jedes Joor e chli meer

Optimiere, Lüt reduziere, fallt de Scheffe nid schweer

Refrain)

….

Keisch denn um, loot me di ligge

I glaub sisch Zyt, dass me s'System in e angeri Richtig cheert!

1)

S'Flugzüg hebt ab, my Chopf wird schwer, I mach d'Auge zue

Dr Buuch goht uf und ab, so langsam chum I jetzt zur Ruue

Ha dr Woolstand zrugg glo, numme s'Nötigscht mitgno

I gang ganz wyyt, verschobni Zyyt

2)

My Taxifaarer raast, dr Vercheer a däm Ort isch s'Chaos pur

I bi im Hotel dr einzig Gascht, sy häi do ganz en angeri Kultur

Bi chli verloore i däm Land, alles unbekannt

Und cha niemer verstoh, trotzdäm blyyb I do

Refrain 1)

Denn I will s’Läbe läbe, so wie's grad chunnt

S' mit Farbe fülle, möglichscht bunt

S' mit Duft yhülle, bluemig früsch

Und s'Schöne gniesse, egal wo'D bisch

I will mi tryybe lo im grosse Läbensfluss

Nimm jede Wasserfall im volle Schuss

Sperr mini Auge uf und dängg nid zwyt vorus

S'chunnt am Schluss ee eso, wie's cho muess

Zwischenteil)

D'Lüt do lääbe eifach, für mi meer schlächt als rächt

E grossi Kluft uf dere Wäält

Doch sy straale mi a, "Hello Mister", iir Lache isch ächt

Si sy so ryych ganz ohni Gäld

3)

So langsam tauch Ig i, als Fremde wirdsch sofort ufgnoo

Wie locker alli si, und wie sy's schaffe s'Läbe laufe z'loo

E chly Nyyd chunnt scho uf, wieso han I das nid druf

Das sett doch go, das chönnt Ig o

Refrain 2)

I miesst halt s'Läbe läbe, so wie's grad chunnt

S' mit Farbe fülle, möglichscht bunt

S' mit Duft yhülle, bluemig früsch

Und s'Schöne gniesse, egal wo'D bisch

I miesst mi tryybe lo im grosse Läbensfluss

Nehmt' jede Wasserfall im volle Schuss

Sperrti d'Auge uf, dänggti nid zwyt vorus

S'chunnt am Schluss ee eso, wie's cho muess

Refrain 1)

1)

As Abschied näh, näi, a das gwöön my nie

Und d'Zyt die rennt viel zschnäll vrby

None letschte Kuss und denn muess I Dii lo ziie

S'isch wieder wunderschön gsii

O I wett Di nid lo goo

Näi bliib doch no

Ha Angscht Du wirdsch nimmi zrugg cho, und mi lo stoo

Und trozdäm: «Schön bisch hüt do!»

Refrain)

Jo klar, I wäiss scho, Du ghörsch mir jo nid

Doch I ha Di halt seer gärn

Muess Di losloh, I dörf nid mid

Wenn Du zrugg goosch uf Bärn

2)

Wenn Du vertroiimt i myne Arme lisch

Und I Di fescht a my drugg

Denn wünsch I mir, dass Du für immer bi mr bisch

Doch Du muesch halt trozdäm wieder zrugg

O I wett Di nid lo goo

Näi bliib doch no

Ha Angscht Du wirdsch nimmi zrugg cho, und mi lo stoo

Und trozdäm: «Schön bisch hüt do!»

Refrain)

Jo klar, I wäiss scho, Du ghörsch mir jo nid

Doch I ha Di halt seer gärn

Muess Di losloh, I dörf nid mid

Du mi Liebi vo Bärn

Jo klar, I wäiss scho, Du ghörsch mir jo nid

Und käis vo ois will all dä Schmärz

Drum löö mr los, höre uf drmit

Doch, Dir ghört e Plazt tief i mim Härz!

1)

D’Bühni isch dunggel, dr letscht Uftritt isch vrby

Nomol abschminggä, sisch wiider wunderschön gsi

Do ä Schulterächlopfe, dört ä schöns Komplimänt

Und denn häisst’s Abschied näh, ä truurigä Momänt

2)

Dr Alltag dä isch schwierig, s’wird erwartet, dass alles stoot

Aber – s’loht mi lo vergässe, dass es mir grad nid so guet goot

I sehn mi zrugg nach däm Ort mit so mene Publikum do

Weiss scho s’chönnt wieder än Absturz gää, I wird trotzdäm dä Wäg go

Refrain)

Ha so vieli Stung gschafft für dä Momänt uf so nere Bühni do

Bi plötzlech hoch obe geschwebt und denn viel z’schnäll obenabe cho

Jetz lig I do im Grabe, ha dr Landeplatz verfehlt

D’Wunde die sie glii verhäilt, s’Erläbte isch’s wo zählt

3)

Im wahre Läbe stang Ig guet, kei Sturm haut mi schnäll um

Ha d’Situatione meischt im Griff, s’lauft sälte öppis chrum

Doch o wenn das ganz schön tönt, heii das älläi cha’s doch nid si

Wett gärn zäige was in mir steckt, wett wüsse wo d’Gränze si

Refrain)

Refrain)

1)

Inere Baar imne Hotel, wyyt wäg vo dehäi

Är sitzt amne Dischli und isch ganz älläi

D Gedangge die kräise dief unge im Glaas

Und är frogt sich: «Werum und wysoo mach I das?

«He Fremde, Hallo», säit e Stimm näbedra

Sii sitzt zu iim aane und lächlet iin aa

Wie ne Ängel uff Äärde, so chunnt si iim voor

Dröimt er, isch är bsoffe oder ischs wirklech woor?

Är luegt ere y d Auge und si luegt nit wäg

D Zyyt schyynt sich z dehne, Minute, Stunge, Dääg

Es bruucht käini Wort um enanger z verschtoo

Iri Häärze häi sich gfunge, si löö sich lo goo

Und im Hotel wirds dunggel, numme nöime blybts hell

Iri Körper verschmelze, gfüült und reell

So glücklech isch är scho lang nimmi gsi

Und er wünscht sich ganz fescht, die Nacht gieng nie verbyy

2)

Doch won är am nechscht Morge syni Auge uffmacht

Und iim denn i Sinn chunnt, was passiert isch letscht Nacht

Drääit är sich umme, doch sisch niemmer mee doo

Sy Ängel aber hett iim e Zettel zrugg gloo

«He Du, sisch wunderschön gsi, aber ha miesse goo»

Es sticht iim ys Häärz, är wills nit verstoo

S Schiggsal isch gemäin, är goot mit leere Häng häi

Mit iir wer är glügglech, wer nimmi älläi

Doch dief y dämm Chummer e Gedangge entstoot

Wysoo bruucht är immer öpper, dass iim besser goot?

Isch är nit älläi dr Schmiid vo sym Glügg?

Und chönnt är sich o gärn ha, zumindescht e Stügg?

So ziet är durs Lääbe mit e me Lächle im Gsicht

Und em ‘ne Funggle y de Auge, wo jeede Chummer uffbricht

Är gniesst die Momänt, wo iim s Lääbe bringt

Mit sym Ängel im Häärz fingt är s schön, dass das glingt

3)

Und är sitzt wiider inere Baar, wyyt wäg vo dehäi

Doch jetzt bruuchts käi fremds Lächle, är isch glücklich älläi

1)

My chly Rolland, chum gimmr d'Hang

Mir spaziere a dr Birs entlang

Verzell mr wie's Dir goot

Wie's um Di stoot

Hesch damals gmäint me gseet Di nid

Und dänggt, dass es a Dir lit

Liebi Lüüt häi Di verloo

Das hesch nid chönne verstoo

Refrain)

Jo I versprich Dr: «Bi immer für Di doo!»

«Chasch all’s wo gsi isch jetzt lo goo»

2)

My chly Rolland, I ha Di gärn

Bisch uf d'Wält cho als lüchtende Stärn

Tief verborge in mir

Steckt vill Liebi vo Dir

Di chönne z gseh tuet so guet

Hilft mr s Läbe z'vrstoo, o wenn's emoll chli wee tuet

Und denn drugg I Di ganz fescht

Das isch für ois bedi s’Bescht

Refrain)

3)

Chumm zäig mr Dini Wält

Nimm mi mit uf Di Zauberfäld

Mini Auge lüchte hell

Uf Dim Karussell

Refrain)

4)

My chly Rolland, chumm mir gäbe ois d'Hang

spaziere zäme a dr Birs entlang

Füül Di bi mir ganz wie dähäi

Schön, dass mir ois gfunge häi

1)

Regigslos, ä starre Bligg, Stillstand vo dr Zyt

I lieg do i dr Notufnahm, drnäbe angri Lüt

Ä riese Ohnmacht und dä Schmärz, wieso bräichts denn grad mi?

Geschter no isch doch die Wält so schön in Ordnig gsi

Refrain)

Jo, es Läbe wie uf Schiene mit klarer Richtig, alles flach

Und wenn's mol rägnet hets grad e Dach

Das wird’s nie gää, I weiss es jo, näi s lauft nid immer rund

Drum wenn’s halt emoll chracht

Und allne Chummer macht

Bin I gspannt uf das, wo denn als nechschts chunnt

2)

Dört won I schaff, dört gfallts mir guet, s’isch immer öppis los

Doch plötzlich chrachts, ha’s nid gsee cho und dr Schade dä isch z’gross

Muess ab uf d'Suechi nach re Stell, wieso bräicht’s denn grad mi?

Geschter no isch doch die Wält so schön in Ordnig gsi?

Refrain)

3)

Und wenn mi’s Flämmli schwecher wird und langsam usgoot

Mi Zyt do uf Ärde dure isch und mi dr Liebgott zu sich holt

Denn hoff I fescht, dass I die Wält im Friede cha verloo

Und Ig im Rückbligg säge cha: «I mach’s nomoll esoo!»

Refrain)

S’wird käi Läbe si uf Schiene mit klarer Richtig, alles flach

Und wenn's mol rägnet hets grad e Dach

Näi, das isch bi niemrem so, es lauft nid immer rund

Drum wenn’s denn s letscht Mol chracht

Mi Körper es Ändi macht

Bin I gspannt uf das, wo denn als nechschts chunt

Mi scho wunger nimmt, was denn als nechschts chunt

Was immer das isch, was denn als nechschts chunnt

Jo, I froi mi uf das, wo denn als nechschts chunt!

1)

Ä Quartier mit Hüüser, ä Blogg isch drby

Irgendwo y oisem Land

D’Sunne goot unger, es dungglet scho gly

Und dr Mond luegt bim Wald üb’re Rand

Drissg Joor lang woont sie jetzt scho do

Ganz rächts im vierte Stogg

Sie het scho vill Priefige miesse bestoo

Und isch dankbar für die Woonig i däm Blogg

2)

Dr Ma isch friie gstorbe, d’Ching woone wyt wäg

Und d’Täg älläi wärde lang

Si het viel krampft, isch drum nimmi so zwäg

Doch s’Guete het immer Vorrang

Mit em Gäld, wo no chunnt, goot sie sorgfältig um

Und d’Rächnyge zaalt sie sofort

Dr Räscht längt zum Läbe nid jedes Mol, drum

Isch Hunger für sie käi fremds Wort

Intermezzo)

Und dusse ghörsch eine umeschreie

Will d’Ching hüt chly lüter sy

An Angere isch am duregheie

S Rückliecht vom Porsche isch hii

Im Huus vis-à-vis rieft ä Frau lut us

Sie het wieder s‘falsch Päggli becho

Und dr Bänker gsesch toobe im glasige Huus

Dr Gwünn vo de Aktie hett gloo

3)

Doch si lit jetzt ganz still im Bett

Und danggt em Liebgott für dä Daag

Für all die Lüt, wo sie um sich het

Und iir hälfe i jedere Laag

Denn bättet sie für die, wo unzfriede sy

Wäge Aarbet, Stress oder Gäld

Sie deggt si sech zue, schloft friedlich y

Und troiimt von ‘re zfriedene Wält

4)

Ä Quartier mit Hüüser, ä Blogg isch drby

Irgendwo y oisem Land

D’Sunne goot unger, es dungglet scho gly

Und dr Mond luegt bim Wald üb’re Rand

Jä d’Zfriedehäit, die chasch niene becho

O nid für no so viel Gäld

Denn d’Zfriedehäit, die muesch lo entstoo

Bi Dir i Diner eigene Wält

1)

Mittwoch z’Obä im Auguscht, Laufe goht go schlofe

D’Birs isch zwar scho s’bitzli hoch, doch niemer macht sich Sorge

S’Liecht wird glöscht, dr Wegger gstellt, die erschte schnarchle scho

Das isch ä Teil vom Drama gsi, doch s’Schlimme wird no cho

Sisch noni zwölfi do muess d’Fürwehr scho s’erscht Mol usrugge

S’het Chäller gfluetet und s’Wasser het dur d’Muure möge drugge

Dr Kriesestab formiert sich, är berotet, diskutiert

„Jetzt eifach nur käi Panik mache, sisch no nüt passiert.“

Refrain)

Rägä Rägä Rägä Rägä Rägä Rägätröpfli

Rägä Rägä Rägä Rägä, s’rägnet uf mis Chöpfli

Immer höcher stiegt das Wasser, Laufe schwemmts fascht wäg

Acht Stung hei mir Venedig gha und denn dr grossi Drägg

2)

Und i dä Chäller foht jetzt langsam s’Wasser afo stiege

Dr Bordeaux und dr Chianti gsesch ganz gmietlech umetriebe

D’Laufner aber sind ganz ruehig am Schlofe und am Troime

Und d’Birs isch churz vor’m Überbordä, d’Fürwehr irgend noime

Dr einti vo dr hingere Gass verwacht und cha nim pfuse

Das Rusche het ihm d’Blose gefüllt, dä Saich dä muess jetzt use

Er sitz uf und scho tuet är d’Fiess im brune Wasser bade

Do schwümmt dr Chlaiderchorb vorbi, so gross isch scho dr Schade

Jetzt lütet jede dr nechsti wach „he cha dis Auto schwümme“

Was möglich isch wird wägbrocht, doch für vieles längts o nümme

Dr Kriesestab sitzt wieder zäme, «sell me alarmiere?»

«Näi jo nid jetzt ä Panik mache, s’chönt öppis passiere!»

Refrain)

3)

Vo Wahle här het är am Morge frieh welle go schaffe

Doch Bahnofunterfiehrig isch liecht mit Wasser überloffe

Är luegt das a, git denn churz Gas und meint «das schaff I scho»

Und so isch Laufe letschtlich zu sim erschte U-Boot cho

Jetzt träie si im Stedtli i dä Böötli ihri Runde

Wie Schifffahrtskapitäne die sie d’Lag vor Ort erkunde

Dr Kriesestab meint «isch do guet hei mir nid alarmiert

Denn süscht wer eventuell no irgend öppis Dumms passiert!»

Refrain)

4)

Dir wärdet sage, sich nid rächt, dass dä eso tuet singe

Vo’r grosse Überschwemmig do so luschtigs Züg tuet bringe

O wenn’s für mängge schlimm isch gsi, I wött mr’s nid lo näh,

Denn s’het nämlich o i der Not viel schöni Sache gä

Zum Biespiel all die viele Hälfer wo freiwillig cho si

Und apackt hei, egal bi wäm, für jede Drägg si do gsi

Me het bim fremde Nochber ghulfe, isch nöcher zäme cho

Und mänggi noii Fründschaft het eso chönne entstoh

So Katastrophe wie die do, si ghöre halt zum Läbe

Sigs Ärdbebe, e Pandemie, oder ebbe o viel Rägä

Ä Kriesestab wird’s immer gäh, är wird o diskutiere

Und s’nechst Mol eventuell denn o d’Bevölkerig alarmiere

Refrain)

1)

Eigentlich sett I lengscht nimmi do si

I ha als Ching im Auto kei Sitzli gha

Und bim Rücksitz het’s kei Gurt dra gha

Eigentlich miesst I hüt total dumm si

Wenn’s ir’ Schuel nid gschnallt hesch, und das het’s gäh,

Hesch kei Förderstunge chönne näh

Und eigentlich miesst I schwerstens vergiftet si

Ha Spielzüg gha mit Cadmium, Blei

Und Dioxin im Chinderbrei

Jä eigentlich miesst I hüt psychisch gstört si

Uf em Pauseplatz do het dr Starchi regiert

Als Schwächling hesch halt on ämol kassiert

Ref)

Und trotzdäm läb Ig und trotzdäm stang I hüt in voller Grössi do

Klar han I Schramme abbecho, klar han I Fädre miesse loh

Ä Bitzli Glück bruchts o, än Ängel wo luegt, und dass Dä nie ufgisch

Ä Diamant, dä glänzt erscht wenn er emoll gschliffe worde isch.

2)

Eigentlich miesst I ä grössre Schade ha

Mit em Velo bin I chopfvora umgheit

Ä Velohelm het do no niemer trait

Eigentlich miesst Ig pädagogisch gschädigt si

Ä Lehrer vo damals immer rächt gha het

O wenn’s meistens gar nid gstummä het

Und eigentlich miest Ig X-mol totchrank gsi si

Mir hai alli us dr gliche Fläsche drungge

O wenn’s emoll e Bitz het gschtungge

Jä eigentlich miesst I hüt ganz schlächt bildet si

Denn ä Pisa Studie het’s nid gäh als Rot

Obwohl – nid all’s wo z’Pisa entstande isch, stoht hüt im Lot

Ref)

3)

Eigentlich sett I lengscht nimmi do si

Doch I ha im Schicksal es Höggli gstellt

Wenn I’s so alueg, I glaub I bi n ä Held!

1)

I dr Praxis vo ihrem Huusarzt, d’Frau Meier fescht chlönt

„I han ä Chratze im Hals, und ä Stimm wo schreklich tönt“

„Jo und wenn mir grad drbi si, o mis Ohrläppli isch rot“

„Und bim Stägästiege muess I schnufe und denn fühl mi halb tot“

„Drum bruch I Voltaren, Aspirin und Panadol“

„Antibiotika, ä Salbi und ä Pflaschter mit Panthenol“

„Und I muess zum Spezialischt für Nase, Ohre und Hals“

„Jo, o s’Kure dörf nid fehle, i dä Terme vo Vals“

Übergang)

Und was es choschtet, jo das loht mi chalt

Denn d’Chranggäkasse die zahlt – jo, d’Chranggäkasse die zahlt!

Ref)

Jä oisi Kasse für die Chrangge

Isch wie nä Süle zum Tangge

Wo jede näh cha ohni Schrangge

Wil är zahlt Prämie viil hundert Frangge

Dumm nimmt ä jede, ohni Gedangge

Möglichscht viil, wenn är tuet tangge

So isch sie ständig ä Bitz am Wangge

Oisi Kasse für die Chrangge

2)

I dr Klinik bim Dr. Fischer ä Paziänt ufem Schrage liit

Är luegt ihn zerscht guet a bevor är d’Aviisige git

„Als Erschts muess I alli Bluetwärt und ä EKG ha“

„Und Bilder mit dr noiä Röntgäkamera“

„Dä Paziänt goht gege 90gi, sis Härz isch nimm so zwäg

Drum brucht är ä Härzschrittmacher und d’Prostata muess o wäg

O s’Chnüglänk muess mä ersetze, o wenn är nimmi lauft

Und dr Nierästeizertrümmrer hai mir nid vergäbe ghauft

Übergang)

Und d’Chöschte jo die löh mi chalt

Denn d’Chranggäkasse die zahlt – jo, d’Chranggäkasse die zahlt!

Ref)

3)

I dr Marketing Abteilig vomne Pharma-Gigant

Wird disktuiert übr’ ä Pillä, wo’s nid brucht i däm Land

Wenn mä sä nimmt churz vor em Schlofe, bevor mä anä lit

Brucht mä numme zwoi Stung Schlof und scho isch mä wieder fit

Offiziell wirkt si gege Sorge und psychischem Schmärz

Und eignet sich o bim nä schwechelnde Härz

Ei Packig choscht 100 Frangge, 90 drvo were Gwünn

S’brucht ä Marketing Kampane und scho were mir drin.

Und dr Priis, bestimme mir iischalt

Denn d’Chranggäkasse die zahlt, jo d’Chranggäkasse die zahlt!

Ref)

Schluss)

Und d’Moral vo dere Gschicht, frei erfunde a mim Pult

Wär nie chrank wird isch sälber Schuld, jo wär nie chrank wird isch sälber Schuld!

1)

Ä Gäldwächselstube am Bahnhof, sisch Ob

Dr Herr Hueber freut sich uf ä baldig Fürobe

Si Kassä isch riichlich mit Nötli bestückt

Und d’Chunde het är mit Fremdwährig beglückt

Ä Dütsche Gschäftsma, ganz stramm, mit Jacket

Mit ’re Tusigernote dr Schalter betritt

Dä luegt ihn ganz ärnscht a und meint zimli harsch

„Ich bekomm dafür Kleingeld, aber rasch!“

2)

Dr Herr Hueber ganz ruehig, är wartet zerscht Schwind

Öb vom Typ vis-à-vis no es „Bitte“ erklingt

Denn meint är ganz sachlich: „Es tuet ihm scho Leid

Aber s’Wächsle vo Chligäld isch ihm untersagt

Er sell’s doch emolle bim Coop dört probiere“

„Da komm ich grad her, sie wolln’s nicht akzeptieren“

D’Stimm wird langsam lüter, dr Ton aggressiv

„Jetzt tun Sie nicht schwierig“ und dr Blick wird ganz stiif

3)

„I dörf numme Fremdwährige usegäh

Sell’s Euro si, Pfund oder ächt Chrone“

„Keine Fremdwährung, Mann, begreifen sie’s nicht

„Nur Kleingeld, Mensch sind sie wirklich noch ganz dicht!“

So loht dr Herr Hueber dä Dütsch do lo tobe

„Ich will Ihren Chef sehn“, „jä dä het scho Fürobe“

„Das hat Konsequenzen“, und dr Chopf wird hochrot

Är schnaubt und tobt, won är dr Schalter verloht

4)

Ä Dame mit-füfzig mit Strickpulli rot

Ä chli spöter am Hueber sim Schalter stoht

Sie lächlet zerscht fründlich bevor sie ihn fragt

Ob är ihr ä Gfalle chönnt mache, so spoot

Si het vo ihr Muetter ä Tusger Echo

I dr Boutique dört äne hai sen nid Anno

Do sait dr Herr Hueber: „das kenne I scho

Do händ si 10 Hunderter, so wird’s scho go!“

5)

Was dä Dütschi chönt lehre und all die Nazione

Wo bi ois die schaffe oder eifach nur wohne

Ä jede Mensch isch doch am Schluss glich viel wärt

Ob är Chef isch oder eifach Gäldnote cheert

Und all diedo Lüt, wo das nid wai kappiere

Die miesse das bi ois halt ab und zu gspüre

Hochnässigi Lüt hai mir z’Morgarte scho

Vom hoche Ross rasch obänabä gnoh

Jä hochnässigi Lüt hai mir z’Morgarte scho

Vom hoche Ross rasch obänabä gnoh

1)

Im Bäre in Grauwil am Stammtisch si sitze

Dr Ruedi, dr Guschti und dr Fritz vo dr Schmitte

Gar heftig wird debattiert, do und dört ghörsch ä Witz

Und im Färnseh lauft dr Match, Spanie gege d’Schwiiz

2)

„He Frölein ä Stange“, rieft dr Fritz hinger d’Theke

„Was bitte“ frogt d’Mila, wo sie chunt cho z’seggle

“Du muscht entschuldigen, är cha nid Hochdütsch schwätze”

Sait dr Guschti zur schöne Polin und versuecht sich im schätzele

3)

„Wo fiehrt das no ane“ meint dr Ruedi ganz empört

„Ohni Hochdütsch wird’sch mol verdurschte, die Wält isch doch gstört“

„Weisch s’Vreni, wo vorhär do gsi isch“ meint do dr Wirt

„Het ä bessere Job gfunge, uf’rä Bank si jetzt kassiert“

4)

„He lueget do d’Schwiizer“ dr Fritz plötzlich rieft

„Shaqiri zum Derdiyok, dä druggt ab und trifft“

„1:0 für ois Schwiizer“ dr Ruedi jetzte chraiit

„Eine Runde auf uns Schweizer“ dr Guschti zur Mila sait

Ref)

Hopp Schwiiz, spielet zäme, hopp Schwiiz non ä Gool

Eso macht das Froid, jä eso fühl mi wohl!

Wenn all enanger hälfe, denn chunt das scho guet

Denn s’isch s’Zäme und s’Mitenanger wo d’Schwiiz hüt bruche tuet

5)

„Jä di Usländer näme ois no alli Arbeitsplätz wäg“

Sait dr Fritz und putzt dr Bierschuum vom sim Schnauz awäg

„Die Iiwanderig muess mä stoppe, die bringt numme Ärger“

„Mir bruche das Pack nid, ohni die si mir stärker“

6)

„So, so gsesch Du das“ meint dr Ruedi und lacht

„Und dr Juri uf Dim Hof, wo für ä Hungerslohn schafft?“

Jä das isch öppis angers“ meint dr Guschti und hänglet mit

„S’isch doch immer ein vo dene, wenn’s noime ä Vrbräche git“

7)

„Los Mila mis Schätzli, fingsch Du denn nid o“

„Dass all die Usländer oiser Land sette verloh“

Sait dr Guschti und luegt ‚rä noche, wo si ufstoht und goht

„Ah, I ha ganz vrgässe, dass si jo kei mundart verstoht“

8)

Und während d’Schwiizer am Stammtisch die wiiter debatiere

Die d’Schwiizer im Färnseh scho wieder brilliere

„Lueg dr Djourou im Xhaka ä Vorlag gäh het“

Rieft dr Fritz, und scho wieder het’s - g’chachelet

Ref)

9)

S’isch leider no oft eso i oisere Schwiiz

Dass d’Lüt einfach glaube, a dä Usländer lit’s

’Si die wo d’Arbet wägnämme und d’Lüt schikaniere

Will ä Partei mit grossem Budget s’eso tuet propagiere

10)

Drbi, wo were mir ohni Giovanni und Mustaffa

Wo vom Morge bis am Obe die chrampfe und schaffe

Stosse baue, Tunnel grabe und die alte Lüt pflege

Und z’Nacht oisi Büro staubsuge und fäge

11)

Zum erfolgrich chönne si, nid numme im Schutte

Hilft än offeni Haltig und dr Glaube a s’Guete

Und wenn alli zämäspiile bliibt d’Hoffnig bestoh

Dass o mir emoll chönne dr Wältmeischter-Pokal becho

Ref)

Ref:

Si wer so gärn emoll im Färnseh cho

Hätt alles gäh um vor ’nrä Kamera z’stoh

Isch sicher gsi sie würdi denn entdeckt

Und chönnti allne zeige was in ihre steckt

1)

S’Läbä isch langwilig, viel Stress und trotzdäm öd

Und – was die Erwachsne meine isch doch völlig blöd

Rich wärde ohni z’schaffe, jo das miest doch go

Drum mäldet sie sich zum nä Casting, singe cha si scho

So stoht si do, i’r Schlange vor em Studio

Zämmä mit e Hufä angere will si im Färnseh cho

Und während si so stoht, träumt si wie’s wird si

Wenn si als Star den gfieret wird vo gross und chli

2)

Gli cha si ine, schnäll dr Tanzschritt, jo dä goht

Und – nomol ä Blick i Texscht, dr Uftritt so dä stoht

Denn chunnt dr gross Momänt, jetzt isch si ändlech dra

D’Schinwärfer, jo die blände, und dört stoht ä Kamerama

Mann isch si jetzt nervös, ihr Härz das schlot ganz fescht

Und si stellt sich schüch vor d’Jury ane und jetzt git si s’bescht

„I bi d’Jeanine vo dr Flue und I sing oich jetzt

Ä Lied vo AC/DC, wo so richtig fätzt“

3)

Si holt tief Luft und macht sanft ihr Auge zue

Doch – kei Ton will usä cho, es herscht ganz edli Rueh

Sandsturm im Muul, dr Chopf hochrot, s’isch wie verreggt

S’Schnufe unmöglich, wil ä Chrott im Hals drin steggt

Sie würgt en abe und verschluggt sich do drbi

Doch das isch no lang nid s’Ändi vo däm tollä Uftritt gsi

Jetzt will si numme wäg, d’Hang hebt si vor’s Gsicht

Sie stülpret über ä Kabel, ä Knall, und nienä meh het’s Liecht

4)

Uf ihre Flucht im Dunggle rennt si in ä Tür

Jo – dass die nid uff isch gsi, cha si doch nüd drfür

Wo si denn wieder zue sich chunnt, und zwar nid gli

Gseht sie zwoi schöni Auge und die säge „He, da’sch geil gsi!“

So het die ganzi Gschicht trotz dere Blamasch do

Doch no es Happy End mit früsch verliebte Turteltübli gno

Und schliesslich het si’s geschafft im Färnseh z’cho allei

Zwar nid als Music Star drfür bim „Leider nei“

Ref

Jetzt isch si doch emoll im Färnseh cho

Hett dörfe ganz churz vor ä Kamera stoh

So het zumindischt öpper si entdeckt

Denn si het zeigt, was wirklich so in ihre steckt

Doch eigentlich haben sie recht: Was können sie wirklich verlieren, ausser sich zu blamieren? Vielleicht würde uns solch eine Sichtweise auch ab und zu das Leben vereinfachen...

1)

Än Äschäbächer wo grad gleert worde isch

Jä dä wird wieder gfüllt

Und duftets noime dinne wunderschön früsch

Wird all’s in Rauch ighüllt

Überall won är uftaucht

Markiert är grad sis Revier

Är stellt sich sofort i Mittelpunkt

Jo är isch es Alphatier

S’Rauche im Auto isch ä Hochgnuss für ihn

Gsesch dinne nummeno grau

Und het är on emolle Fahrgescht mit drin

Si die schnäll grien und blau

Alli miese sich fiege

Me het ganz einfach kei Wahl

Eimol nid rauchä het’s nie gäh

Jo so isch das gsi damals

Ref

Är isch en gsi, das het me gseh

Em Chetteraucher ghört die Wält, und no vieles meh

So isch es gsi, mä het’s lo gscheh

Är zahlt jo oisi AHV, was willsch denn no viel meh

Ä Prisä blaue Dunscht

Das isch für ihn kei Kunscht

Ob Malboro, Muratti, Camel das isch doch egal

Dr Chetteraucher isch en gsi - damals

2)

So langsam füllt sich sini Lunge mit Teer

Dr Kehlchopf wird perforiert

Mit dr Ziit wird denn o s’Schnufe ganz schwer

Und s’Raucherbei amputiert

Es liede nid numme d’Raucher

Nei o d’Nichtraucher, die triffts

Es git kai angere Uswäg

Als dass s’Rauche igschränkt wird

Im Zug wird s’Raucherabteil chlinner und chlinner

Und ganz am Schluss eliminiert

Kei Flemme meh im Flugzüg und Sitzigszimmer

Egal ob är dra krepiert

Sogar ums letzte Refugium

Isch i dr Zwüscheziit gscheh

Am Stammtisch, a sim Heiligtum

Stoht kei Äschäbächer meh

Ref

Jetzt isch’s vorbi, das cha me gseh

Dr Chetteraucher het’s nid licht, es will en keine meh

So isch es gsi, wie cha das gscheh

Är zahlt doch oisi AHV, was willsch denn no viel meh

Ä Prisä blaue Dunscht

Das wird jetzt zu ’nrä Kunscht

De Malboro, Muratti, Camel, dene isch’s egal

Dr Chetteraucher het’s nid licht, doch är het kei Wahl

3)

Do plötzlich goht ä riese Ufschrei durch s’Land

Jo jetzt muess öppis gscheh

Mä gründet schnäll ä Chetteraucher-Verband

Süscht git’s gli keine meh

Es cha nid si dass är usstirbt

Das wer ä Bruch ir Tradition

Es isch so wichtig dass är gschützt wird

Jo es brucht jetzt Subvention

Dr Bundesrot beschliesst ä Notfallpaket

Denn d’AHV isch in Gfohr

Für so nä Rettig wird o d’Staatskasse gleert

Ä Schutzprogramm wird jetzt wohr

Dir findet die Gschicht do übertriebe

Doch genau das passiert mehr und mehr

So Uslaufmodäll het’s und wird’s no viil gäh

- und mir chönne ois no so sperre drgegä -

Irgendwenn isch’s denn um se gscheh!

Ref

Es isch vorbi, das cha mä gseh

Dr Chetteraucher stirbt jetzt us, gli git’s ä keine meh

Wie cha das sii, wie sell das gscheh

Wär zahlt jetzt oisi AHV, es raucht gli keine meh

Ä Prisä blaue Dunscht

Das blibt ä fromme Wunsch

Und Malboro, Muratti, Camel, die hai o kei Wahl

Dr Chetteraucher stirbt jetzt us

Isch das nid brutal?

Es isch vorbi, das cha mä gseh

Dr Chetteraucher stirbt jetzt us, gli git’s ä keine meh

Wie cha das sie, wie sell das gscheh

Wär zahlt jetzt oisi AHV, es raucht gli keine meh

Ä Prisä blaue Dunscht

Das blibt ä fromme Wunsch

Und Malboro, Muratti, Camel, die hai o kei Wahl

Dr Chetteraucher stirbt jetzt us…

Isch doch mir egal!

1)

I han ä Gschänggli becho und mach’s grad uf

Ä Zettel chunnt füre mit Warnigä druf

Ä ganzi Lischte vo Sache, wo chönne passiere

Sälbscht bim’ nä Teelichtli tuesch hüt dis Läbe riskiere

Do letscht gang Ig zum Dokter, mi Rügge tuet weh

Är git mr Tablette, 3 pro Tag und nid meh

Doch won I d’Lischte studier mit dä Näbäwirkige

Isch mi Rüggäweh plötzlich verschwunde

Ref)

Jo s’Läbe isch gförlich, scho immer so gsi

S’cha so viil passiere Johr-us und Johr-i

Doch was zellt bi dä Gfohre si d’Folge drvo

Denn was immer mir o mache, damit‘s jo nid tuet chrache, es bestoht – ä Räschtrisiko

2)

Jä bi de Hiiwis uf Gfohre, wird viil übertriebe

Und luschtigi Sache uf d’Verpackige gschribe

Wie zum Bischpil bi dä Chinderwäge, dä modärne:

„Beim Zusammenklappen vorher das Kind entferne“

Uf dr Chettäsägi stoht: „Nicht mit der Hand anhalten“

Und uf dr Milchpackig chasch läse: „Kann Milch enthalten“

Bim Glettiisä heists: „Nicht am Körper benutzen“

Wird bim Gwitter s’Händy glade “kann ein Stromschlag sie wegputzen“

Ref)

3)

Numme dört wo’s gföhrlich wer, dört fingsch hüt kei Warnig

Denn für viili, chasch meine, bestoht die Gfohr gar nid

Oder hesch scho mol im Auto uf’mä Schildli chönne läse:

„Dieses Auto kann sie töten und auch andere Läbewäse“

O bim Strom isch’s nid angerscht, numme s’Billigscht dörf’s si

Und für Gfohre bim Produziere, mir nid zuständig wai si

Denn süscht miesst ä jedi Dose ä Texscht ane ghöre

„Dieser Atomstrom kann die Heimat für immer zerstöre“

Ref)

Egal, was für Sicherhaitsmasnahme ergriffä wärde, es bestoht immer… ä Räschtrisiko

Egal, wie chli d’Wahrschiinlichkeit für än Unfall o isch, es bestoht trotzdäm …ä Räschtrisiko

Und egal, was d’Politiker alles behauptä, schlussändlich bestoht glich…. ä Räschtrisiko

….. nei, so öppis passiert bi ois sicher nie …..pch!

1)

I bi am Zitigläsä, s’isch schön still

Mi Frau chunnt, will si öppis will

Foht ä schwätze, so dass I nimmi läsä cha

Muess mit em Finger d’Stell im Texscht markiere

Dass I no weiss, wo wiiiter, nachem diskutiere

Cha nid läsä und losä glichzitig – I bi halt ä Ma

2)

Denn über tusigi vo Johr het dr Ma glehrt jage

Het d’Familie miesse mit Fleisch versorge

Was är chönne het, wil är fokusiere cha

Är het stundelang ruehig chönne si

Bis dr richtig Momänt denn do isch gsi

Ä Sperrwurf, troffä, än erfolgriche Ma

3)

Dä Fraue het är gärn imponiert

Und sä glichzitig o respektiert

Sä beschützt, dass sie kei Angscht hei miesse ha

Und wenn er ämoll dr Drang het gha

Het är sä umworbe, sini Eva

Är het becho was är het welle, oisä Ma

4)

Und Diskussione het’s keini gäh

Dr Chef-Thron het är sich nid lo näh

Nur mit Härti het mä Respäkt chönne ha

Todesmutig het är Finde verschlagä

Riskiert drfür si Chopf und Chragä

S’isch ganz klar gsi, was sich ghört het, damals als Ma

5)

Doch d’Ziite, jo die ändre sich

Hüt reglet mä d’Sache friedlich

Und Musklä muesch als Ma o nimmi ha

Alles redet vo Emanzipation

Är nid mitschwätzt bi dere Diskussion

Es goht ihn jo gar nüd ä, är isch jo ä Ma

6)

Drum het är wiiter gmacht wie friener

Isch für d’Frau und d’Ching dr Gäldverdiener

Und isch sicher gsi, dass är’s so guet wird ha

Bis ihn d’Frau eines Tags vor d’Türe stellt

Und är lehre muess, was i dr Wält hüt zellt

Dörf wiiter bläche, denn är isch halt ä Ma

7)

Und dr Gscheiti dä het’s gli kapiert

Het d’Erfolgsfaktore vo dr Frau kopiert

Isch ifühlsam und het gärn Gspröchli gha

Är het dr männlich Drang eifach wäg kastriert

Mit Kosmetik sini Falte kaschiert

Und vergisst drbi ganz gärn: är isch jo ä Ma

8)

Und dr Afiehrer het’s i’s Kader gschafft

Är chrampft drfür zwar Tag und Nacht

Und het glehrt wie är mit em Drugg umgoh cha

Doch plötzlich wird är frischtlos entloh

Ä Sicherig brennt dure, niemer weiss wieso

Im Freifall verloht är die Wält, ä verzwieflete Ma

9)

Drumm frog I mi als Ma hüt scho

Öb’s mi no brucht, dass s’Läbe cha bestoh

Denn Spermie chasch o in Konsärve ha

Doch denn gsehn I mi Frau, wo mi alächlet

Und mir wird klar, dass mä als Ma hüt scho mehr zbietä het

Und wird’s mol z‘viel mit all‘m säg I mir eifach: I bi halt ä Ma

I cha’s nid leugne, es isch äso: I bi halt ä Ma!

1)

Am Morgä stang I gärn am Strosserand

Und amüsier mi ab däm bunte Triebe

Die einte Chinge wärde gfiert ar Hand

Die andre gsesch nur hinter Windschutzschiebe

Jo jetzt isch alles uf dä Bai

2)

Uf em Schuelhusplatz do muesch guet um di luege

Denn die Chline chömme umme Egge z’schliche

S’het Verlofahrer und Töflibuebe

Und grossi Schieler wo nid wai uswiche

Do fühlt sich niemer me allai

3)

Als wär das alles zäme noni gnue

Zwänge sich jetzt o no d’Auto dure

Lade d’Chinge alli ab im Nu

Möglichscht noch bi dr Schuelhustüre

Hey jo dass sie halt nid wit hai

Ref

Uf em Schuelwäg do spielts Läbe

Uf em Schuelwäg isch viel los

Unterwägs bi Schnee und Räge

Mit em Schuelwäg wird me gross

Uf em Schuelwäg git’s viel z’verzelle

Uf em Schuelwäg isch mä sälte allai

Bisch chli spot, so muesch halt renne

Schön dass d’Ching ä so nä Schuelwäg hai

4)

Jo so stohn’I do und gseh no vieles mehr

Do tätscht vo hinge öpper in mi ine

„He, s’tuet mir Leid, ha Si nid chönne gseh

I bi grad am ne SMS schribe“

Sie lächlet und scho isch si wäg

5)

Und d’Auto stauts scho bis zur Baslerstross

O s’Susi muess jetzt i dr Reihe stoh

Wieso si s’Auto nimmt, sie miesst nur über d’Stross

“I cha doch d’Ching nid eifach z’Fuess lo go

Bi däm Verchehr wo’s do fangs het“

Ref

Zwischenteil

Jo d’Elträ wai nur’s Bescht für d’Ching

Vor Schmärz und Leid bewahre

Meine’s drbi oft ä Bitzli z’guet

Dr Schuelwäg z’Fuess dä het si Sinn

Viel mehr als d’Chinge z’fahre

Ä Bitz Bewegig doch allne Ching guet tuet!

6)

Würum nid d’Ching emoll ä Stück begleite

Nä zeige wie me d’Strosse überquert

D’Ching erläbe wie sie Freud verbreite

Wie isch ihr Läbe doch no unbeschwert

Das chönne z’gseh tuet doch o guet

Ref

Uf em Schuelwäg do spielts Läbe

Uf em Schuelwäg isch viel los

Unterwägs bi Schnee und Räge

Mit em Schuelwäg wird me gross

Uf em Schuelwäg git’s viel z’verzelle

Uf em Schuelwäg isch me sälte allai

Bisch chli spot, so muesch halt renne

Schön dass d’Ching ä so nä Schuelwäg hai

Unterwägs bi Schnee und Räge

Uf em Schuelwäg do spielts Läbe

Uf em Schuelwäg isch viel los

Uf em Schuelwäg isch chli und gross

Uf em Schuelwäg isch mä sälte allai

Schad für die Ching wo hüt kei Schuelwäg me hai

1)

Mi erschti Liebi isch ir Schuelziit gsi, I gseh se no vor mir

Blaui Auge, gross und schlank, d’Hoor es Bitzli wirr

Doch oise Liebi isch nid eifach gsi

Denn sie het nid gemerkt dass sie mi Fründin set si

Mi erschti Liebi isch dr Stefan gsi, I find en hüt no toll

Bim Fläschespiel do han en s’erschtmol küsst, und glächlet liebevoll

Und grad denn muss doch die doofi Anna cho

Und mi Stefan hat mi einfach links lo stoh

Ref

D’Schuel isch o nä Läbensschuel; me hets nid immer liicht

Hüt würde gwüssi Sache sicher angerscht mache

Doch misse wött I nüd

Ir Schuelziit chunt die erschti Liebi, der Chummer mit drzue

Wieso will sie mi nid verstoh

Wieso loht är mi so lo stoh

Irgendwenn do merkt me denn, dass sich d’Liebi halt nid stüre loht

2)

I ha nä türi Hals-Chetti gchauft und mit mim Sackgäld zahlt

Ha dänggt wenn sie das tolle Gschänkli gseht, fallt sie mir umme Hals

Mit me Briefli zäme isch per Poscht zu ihr

Und I ha gwartet, und gwartet, und gwartet, bis ihr Vater alles zrugg gschickt het zu mir

Bi sicher gsi dr Stefan isch grad blind, d’Anna isch nüd für ihn

Han en Intriege gstartet gege sie, entlarvt als Liegnerin

Und ganz zum Schluss het är se prompt lo stoh

Doch anstatt mi het dä Dubel s’Gaby gno

Ref

D’Schuel isch o nä Läbensschuel; me hets nid immer liicht

Hüt würde gwüssi Sache sicher angerscht mache

Doch misse wött I nüd

Ir Schuelziit chunt die erschti Liebi, der Chummer mit drzue

Wieso will sie nid mit mir go

Wieso het är die angeri gnoh

Irgendwenn do merkt me denn, dass sich d’Liebi halt nid stüre loht

3)

I ha nen doch so gärn

Wött so gärn mit ihm go

Würd strahle wien ä helle Stärn

Är miesti nie im Dunkle stoh

Im Läbe isch’s no oft eso

Nid all’s wo d’gärn hesch chasch becho

O das ghört zum erwachse wärde

S’tuet zwar weh, doch s’macht Di stercher

Ref

D’Schuel isch o nä Läbensschuel; me hets nid immer liicht

Hüt würde gwüssi Sache sicher angerscht mache

Doch misse wött I nüd

Ir Schuelziit chunt die erschti Liebi, der Chummer mit drzue

Wieso chan I sä nid becho

Wieso will är nid mit mir go

Irgendwenn do merkt me denn,

dass d’nid alles wo dä gärn hesch chasch becho